過年前開始
平時買慣的魚貴了
唯獨這生劏大龍躉沒加價
索性買龍躉肉啖啖肉冇下欄
材料
龍躉肉10両 發好冬菇4隻 炸枝竹2條 火腩少許
蒜頭 乾蔥 薑 青蔥各適量
做法
- 炸枝竹切段用水浸過，揸乾水備用
- 魚肉洗淨瀝乾水，再用廚房紙吸乾，加薑汁酒，鹽糖胡椒粉醃(鹽要少少可以了)約10-20分鐘，拍乾生粉備用
- 大火炸至少少金黃色盛起備用
- 爆炒料頭，下火腩、冬菇略炒，讚酒，下滾水，調味(豉油蠔油糖)煮約10分鐘，試味調味
- 下魚塊、枝竹煮約10分鐘，下青蔥打獻上碟
這道菜可以用煲仔上
可用龍躉頭腩或其它魚代替龍躉肉
配菜可用任何自己喜歡的材料
喜歡蒜朋友可加多點炸蒜子
聽就聽得多，但我由細到大都冇食過。😂
回覆刪除我都係由細聽到大，最近幾年才吃過，因為大龍躉比以前平了很多，成了普通的食材。好食的，你也試試。
刪除炆龍躉，好正呵！
回覆刪除謝謝！真係好正噢！
刪除嘩！翠兒見你整的餸令我很回味童年時食過的味道，不過已經冇食咗幾十年囉！自己就一次都未煮過，我記憶有豆腐卜，炸枝竹，火腩好入味
回覆刪除兒時的回憶，真好！配菜可加任材料，總之自己覺得好吃的就行，好好味！
刪除你真係煮乜都咁好味．我自從疫症，叫Ｄ後生盡量少Ｄ返來食，自已一人求其一餐便算。
回覆刪除謝謝讚賞！我都係叫佢地少D返來，但要有人返才有得煮。
刪除你真好手勢，看來整得好好吃。
回覆刪除炇煮龍躉我都是和家人在外吃的多，在家很少煮。一個人頂多是蒸條黃花、鯧魚、桂花就算，取其方便快捷。
秋葉阿姨過獎了，不過真係幾好味架。
刪除炆餸要多人吃才適合，一個人還是蒸比較好。
普通蒸魚我就識，但炆龍躉我就未試過，因為覺得幾麻煩。好似要用幾件火腩做配料，買得多又要被廹食多碟燒肉，買得少人哋又未必做你生意。
回覆刪除炆餸好似好麻煩，但如果有準備，其實都唔係太難。
刪除火腩是多款炆餸的配料，炆大鱔，炆冬菇，炆豆腐...一開始我都為這少許火腩傷腦筋，試過去油雞檔買20蚊，講明用來炆餸，畀砧板面的少許可以，後來發現一間燒臘店，將這些頭尾碎料切成細細盒，現在賣18蚊，買一份回家分開三份，先用一份其餘兩份放冰格，用時解凍，好方便。冬菇也可先浸發，蒸或煮約30分鐘，分成小份放冰格，用時取一份，整個炆餸變得輕而易舉。炆餸好味，試下。